Gjykata e LartëGjykata e Lartë, në kuadër të iniciativës “Dita e hapur në Gjykatë”, hapi dyert të mërkurën, për një grup studentësh të Fakultetit të Drejtësisë së Universitetit të Tiranës dhe Universitetit “Epoka”. Sudentët vizituan nga afër ambjentet e Gjykatës e Lartë të Republikës së Shqipërisë dhe ndoqën një Orë të Hapur diskutimi me gjyqtarin i cili ushtron detyrën e ndihmës magjistratit në këtë gjykatë Z. Elton Frashëri dhe specialistin e Qendrës së Dokumentacionit Z. Oltion Musaj.
Diskutimi u fokusua në tema me interes për historinë e sistemit të drejtësisë dhe gjyqësorit në Shqipëri, ndarjen e pushteteve, ndryshimet ligjore dhe veçanërisht në organizimin dhe funksionimin e Gjykatës së Lartë.Gjykata e Lartë mendon dhe i kushton rëndësi faktit se, përfshirja e paketave informuese dhe programeve rreth edukimit ligjor, është një mekanizëm i cili synon të afrojë më shumë çdo të interesuar për t'u njohur me këtë institucion, historinë dhe rëndësinë që mbart.
"Dita e Hapur në Gjykatën e Lartë", është konceptuar si një ditë dialogu mes nxënësve të të gjitha moshave, studentëve dhe gjyqtarëve. Gjatë kësaj dite gjyqtarët i përgjigjen me detaje çështjeve apo pyetjeve të shtruara nga të ftuarit, bëjnë një panoramë të sistemit gjyqësor në Shqipëri dhe testojnë njohuritë e përgjithshme të nxënësve dhe studentëve mbi sistemin gjyqësor, trajtimin e temave të ndryshme me interes sipas grupeve që vizitojnë gjykatën, si edhe vizita në ambjente të ndryshme të godinës, sallave të gjyqeve, sallës së mbledhjes së gjyqtarëve, etj.
Duke shpresuar se kjo mundësi do të shërbejë për të arritur qëllimin tonë, për një gjykatë më pranë publikut, më transparente dhe miqësore, ftojmë të gjithë të interesuarit të bëhën pjesë e saj. Kushdo që ka interes për të vizituar Gjykatën e Lartë, (qytetarë, studentë, nxënës shkollash) duhet të regjistrohet në faqen zyrtare të kësaj gjykate www.gjykataelarte.gov.al, në rubrikën “Marrëdhëniet me Publikun” – Akreditimi ( http://gjykataelarte.gov.al/web/Akreditim_9953_1.php )
